Parlament Nümayəndə Heyəti TÜRKPA-nın tədbirlərində

Parlament Nümayəndə Heyəti TÜRKPA-nın tədbirlərində


Milli Məclisin Sədri Oqtay Əsədovun başçılığı ilə parlament nümayəndə heyəti TürkPA Assambleya Şurasının və təşkilatın növbəti 6-cı plenar iclaslarında iştirak etmək üçün dekabrın 2-də Qazaxıstanın paytaxtı Astana şəhərinə səfər edəcək.

Gecce.az Milli Məclisin mətbuat xidmətinə istinadən xəbər verir ki, nümayəndə heyətinin tərkibinə Milli Məclisin komitə sədri Əhliman Əmiraslanov, deputatlardan Çingiz Qənizadə, İlham Əliyev, Sədaqət Vəliyeva, Sevinc Hüseynova, Cavanşir Feyziyev, Cavanşir Paşazadə, Parlament Aparatının rəhbəri Səfa Mirzəyev və digər rəsmi şəxslər daxildirlər.
Qurumun Şura iclasında Azərbaycanın təşkilata sədrliyinin nəticələri, TürkPA Katibliyinin illik fəaliyyəti barədə hesabatlar dinləniləcək və digər təşkilatı məsələlərə baxılacaq. TürkPA-nın 6-cı plenar iclasında Azərbaycanda, Türkiyədə, Qazaxıstanda və Qırğızıstanda keçirilmiş seçkilərə dair məruzələr dinləniləcək, qurumun komissiyalarının tövsiyə qərarlarına baxılacaq. İclasın sonunda Astana Bəyannaməsi imzalanacaq.
Azərbaycan Parlamentinin Spikeri Oqtay Əsədov tədbirdə ölkəmizin təşkilata sədrliyi dövründəki fəaliyyəti barədə, quruma üzv ölkələr arasında informasiya və media sahəsində əməkdaşlığa dair və gündəlikdəki digər məsələlərlə əlaqədar çıxışlar edəcək.
Milli Məclis Sədrinin Qazaxıstan Prezidenti Nursultan Nazarbayevlə və tədbirdə iştirak edən nümayəndə heyətlərinin başçıları ilə bir sıra görüşləri nəzərdə tutulmuşdur.
Səfər çərçivəsində nümayəndə heyətimizin üzvləri “Böyük Çöldə dövlətçilik və parlamentarizm” mövzusunda beynəlxalq konfransın işinə qatılacaq, Türk Akademiyasında, Qazaxıstan Milli Muzeyində, ölkənin Birinci prezidentinin kitabxanasında olacaqlar.
Səfər dekabrın 4-də başa çatacaq.
Bu xəbəri oxuyanlar aşağıdakı xəbərləridə oxuyub
 
Xəbər lenti