Azərbaycan-Fransa işgüzar görüşü keçirilmişdir

Azərbaycan-Fransa işgüzar görüşü keçirilmişdir



Fransanın Mərkəzsizləşdirmə və Dövlət Qulluğu üzrə Nazirliyinin Regionların islahatları məsələləri üzrə dövlət katibi Andre Vallininin başçılıq etdiyi nümayəndə heyətinin Azərbaycana səfəri çərçivəsində İqtisadiyyat və Sənaye Nazirliyinin təşkilatçılığı ilə Azərbaycan-Fransa işgüzar görüşü keçirilmişdir.

Gecce.az İqtisadiyyat və Sənaye Nazirliyinə istinadən xəbər verir ki, görüşdə Azərbaycan- Fransa Regionlararası Əməkdaşlıq Şurasının yaradılması istiqamətində görülən işlər müzakirə olunmuşdur.
Bakı Biznes Mərkəzində təşkil olunmuş tədbirdə çıxış edən iqtisadiyyat və sənaye nazirinin müavini Sevinc Həsənova Azərbaycan və Fransa arasında siyasi, sosial, humanitar və iqtisadiyyatın müxtəlif sahələrində əlaqələrin uğurla inkişaf etdiyini, ölkələrimizin əməkdaşlığın, o cümlədən regionlararası əlaqələrin genişləndirilməsində maraqlı olduğunu vurğulamışdır. Nazir müavini Sevinc Həsənova Azərbaycanın 12 şəhəri ilə Fransanın 10 şəhəri və 1 vilayəti arasında qardaşlaşma və əməkdaşlığa dair sənədin imzalandığını xatırlatmışdır. Qeyd edilmişdir ki, Azərbaycanla Fransa arasında əldə olunmuş razılığa əsasən, Regionlararası Əməkdaşlıq Şurasının yaradılması nəzərdə tutulur. Azərbaycan Respublikasının İqtisadiyyat və Sənaye Nazirliyi ilə Fransanın Mərkəzsizləşdirmə və Dövlət Qulluğu üzrə Nazirliyi Şuranın yaradılması istiqamətində ardıcıl işlər aparır və bu gün keçirilən işgüzar görüş də Əməkdaşlıq Şurasının yaradılması baxımından əhəmiyyətlidir.
Tədbirdə həmçinin, Dağlıq Qarabağda fəaliyyət göstərən Fransa şirkətlərinin, eləcə də Azərbaycan Respublikasının işğal olunmuş rayonları ilə qeyri-qanuni xartiyalar imzalamış Fransanın bəzi vilayət və şəhərlərinin siyahısı Fransanın Mərkəzsizləşdirmə və Dövlət Qulluğu üzrə Nazirliyinin Regionların islahatları məsələləri üzrə dövlət katibinə təqdim edilmiş, bunun beynəlxalq hüquq normalarına zidd olduğu vurğulanmışdır. Fransanın Mərkəzsizləşdirmə və Dövlət Qulluğu üzrə Nazirliyinin Regionların islahatları məsələləri üzrə dövlət katibi Andre Vallini bu məlumatları Fransa Hökumətinə çatdıracağını bildirmişdir.
Fransanın Mərkəzsizləşdirmə və Dövlət Qulluğu üzrə Nazirliyinin Regionların islahatları məsələləri üzrə dövlət katibi Andre Vallini iki ölkənin bölgələri arasında əməkdaşlığın davamlı olaraq inkişaf etdiyini diqqətə çatdırmış, Azərbaycan və Fransa Regionlararsı Əməkdaşlıq Şurasının yaradılması istiqamətində həyata keçirilən tədbirlər barədə məlumat vermişdir. Andre Vallini Fransanın bir sıra ölkələrlə bu cür əməkdaşlıq mexanizmlərinin yaradılmasında geniş təcrübəyə malik olduğunu qeyd etmişdir.
Sonda Fransa Respublikasının Xarici İşlər Nazirliyinin Beynəlxalq İnkişaf Departamentinin nümayəndəsi Florian Varailin Regionlararası Əməkdaşlıq Şurasına dair təqdimatı olmuş, Şuranın yaradılmasının hüquqi əsaslarının təşkili, iş mexanizmi və təşkilati-struktur əsasları barədə məlumat verilmişdir.
İşgüzar görüşdə əməkdaşlığın genişləndirilməsi üzrə Azərbaycan-Fransa Regionlararası Əməkdaşlıq Şurasının yaradılmasına dair konkret addımlar müzakirə edilmişdir.
Bu xəbəri oxuyanlar aşağıdakı xəbərləridə oxuyub
 
Xəbər lenti